Maiatzaren 17a «mobilizazio orokor egun» bat izan dadin dei egin dute Bernat Etxepareko ikasleek, 'Azterketak Euskaraz' aldarrikatzeko. Korrikaren kari egin zuten gisara Euskal Herri osora zabaldu dute erronka, sare sozialetan partekatu duten bideo baten bidez.

Baxoko azterketak hurbiltzen ari direla, «aurten ere, frantsesez egitera behartuak» izanen dira Bernat Etxepare lizeoko ikasleak. «Noiz arte onartuko dugu mespretxu hau gure hizkuntzarekiko? Aski da errateko tenorea da, herri bat aitzinean dutela erakutsi behar diegu, herri bat bere hizkuntza babesten», adierazi du Baionako ikastetxeko ikasle asanbladak. Horretarako, maiatzaren 17an «mobilizazio orokor eguna» deitu du Euskal Herri osoan, sare sozialetan publikaturiko bideo baten bidez.

«Gure txikitasunetik ezinezkoa zaigu Euskal Herriko bazter guzietara heltzea, baina bazter guzietan badira euskaldunak gure zauria bere egin dutenak, Korrikan erakutsi zeniguten bezala», gogorarazi du asanbladak. Izan ere, Korrika garaian, Bernat Etxepare lizeoko ikasleek Euskal Herri osoko ikastetxe eta elkarteei, Korrikan banderola bidez haien aldarria sustengatzeko deialdia luzatu zieten. Alimaleko parte hartzea lortu zuten, Ane Elordik, Korrikako koordinatzaileak, «aurten inoiz baino gehiago omendua presente egon dela lasterketan zehar» azpimarratzeraino, 23. Korrikaren bilana egiterakoan.

Hala, ikastola, ikastetxe, elkarte, herri mugimendu eta euskaltzare orori deialdiak antolatzeko deia luzatu diete berriz ere ikasleek, mobilizatzeko manerak proposatuz: «manifa, elkarretaratze, bidean jarri, okupazio, banderolak eta afitak eman, kalejira bat egin, kantatu, irrintziak bota, zarata egin, argazkiak... edota burutatzen zaizuen beste edozer».

Egiten dena sare sozialetan igotzea galdetzen dute, #EuskarazIkasiMatxinada eta #EuskarazBiziMatxinada leloekin.