Formazio Teknikoa 2.800 ordukoa izango da eta urte bitan gauzatuko da (2019-2020), CECIDIC erakundearen egoitzan (Tunxiwxu-Toribio, Norte, Cauca, Kolonbia). Ikastaroaren ardura nagusia CECIDIC erakundeak duen arren, alboan ditu antolatzaile gisa UAIIN unibertsitate indigena eta Garabide Elkartea. Babesle gisa Cauca Departamenduko hainbat erakunde indigena ageri dira: Asociación de Cabildos de Toribio Proyecto Nasa, Çxhab Wala Kiwe-ACIN, Asociación de Cabildos Nasa Çxhäçxha eta Tunxiwxu-Toribioko Udala.

Lehen aldiz izango da halako formazio batean Nasa Yuwea oinarrizko komunikazio hizkuntzatza, helburua %80ean erabiltzea baita. Gogoan izan behar da, formazio honen aurrekaria izan zen 2018ko Diplomaturan %70ean erabili zela Nasa Yuwe elea. Ikastaroa gainditzen dutenek, Nasa Yuwe hiztunak nahitaez, UAIIN unibertsitatearen titulu ofiziala jasoko dute.

Formazio Tekniko honen helburua Nasa Yuwe hizkuntzaren biziberritze prozesua indartzea, bultzatzea eta aberastea da, besteak beste eragileak tekniketan eta estrategietan trebatuz. Bada helburua ere Nasa Yuwe elea arlo akademikoan erabiltzearen ohitura sendotzea eta prestijiatzea.

Garabide Elkartearen zeregina Formazio Tekniko honetan biziberritze lanabesak, teknikak eta estrategiak partekatzea da, hala nola hezkuntza arlokoak edo helduen irakaskuntzakoak eta hizkuntza plangintzakoak. Egitasmo hau gauzagarri Gipuzkoako Foru Aldundiak, Durangoko Udalak eta Euskal Herriko hainbat adituk eta ekintzailek egin dute.