Ama hizkuntzaren nazioarteko eguna ospatzen da otsailaren 21ean, eta baita ederki ospatu ere Yucatango maiek. Azken bi urteotan Yucatango Maiaren biziberritze prozesuak ikaragarrizko bultzada jaso du Kellog Fundazioari esker martxan jarri ahal izan zen proiektuarekin. Hori gutxi ez eta Donostiako Udalaren aholkularitza jasotzen duen Meridako Udalak hizkuntzaren normalizazioan pausu sendoak emateko konpromisoa hartu du legegintzaldi berrian, eta hori agerian uzten duen hitzarmena sinatu zuten bertako alkate den Cecilia Patrón Laviadak eta Garabideko lehendakari orde den Jon Sarasua Maritxalarrek.

Ekainean hasi zuen legegintzaldia udal talde honek, eta hasieratik erakutsi du Yucatango Maiaren aldeko konpromisoa udaleko sail gehienetan zehar lerro bezala estrategikoki jarriz. Hitzarmen hau 2022an orduko udal taldeak Euskal Herrira eta batez ere Donostiako Udalera eginiko bisitaren ondorio da, Yucatango hiriburuan hizkuntzaren biziberritze eta normalizazioan pausu garrantzitsua emanez.

2024an egungo udal taldearen beste bidaia bat aurreikusten da Euskal Herrira, euskararen normalizazio eta biziberritze prozesuaren gakoak bertatik bertara ezagutu ahal izateko. Donostiako Udaleko euskara sailaren funtzionamendua gertutik ezagutzeko aukera ere izango dute, hori izan baita eta aurrerantzean ere izango baita informazio iturri Meridan pausuak ematen jarraitzeko.