2009ko uztaila.  Hilaren 17an egin dute Cotopaxiko Latacunga hiriburuan MICC nekazari eta indigenen mugimenduak abian jarri duen TVMicc telebista katearen inaugurazioa. Bertako komunitate indigenentzat eta Ekuador guztiko mugimendu indigena osoarentzat ez ezik, Garabide elkartearentzat ere ondo albiste pozgarria da, lankide izan gaituztelako telebista katea abian jartzeko aurreko hilabeteotan.

Inaugurazio ekitaldiak goizeko 9etatik arratsaldeko 5ak arte egin zituzten, eta tarte hori guztia zuzenean emititu zuen telebista berriak.

Kaleko desfileetan komunitate indigenen elkarteak ibili ziren, Cotopaxikoak ez ezik Tungurahuakoak ere bai. Egoitzaren eta langileen garbiketarako errituala Salcedoko Yachak-ek egin zuten.

Ondoren aurkezpen eta inaugurazio ekitaldi ofizialean, MICCeko agintariekin batera hiriko eta probintziako agintariak eta Ekuadorko erakunde indigena nagusienak izan ziren.

Otsailetik probako emisioetan

Joan den otsailaren hondarrean hasi ziren probatarako lehen emisioak egiten eta uztailaren hasieran ekin diote zuzeneko saioak emititzeari. Kitxueraz emititzen duen lehen telebista da eta aurreneko saio hauek albisteenak eta iritzi saioak dira.

Froga moduan, kultur-artekotasuna eta herri indigenen komunikazio beharrak hizketagai zituztela zuzeneko saioa egin zuten joan den ekainaren 12an. Han izan zen besteak beste Garabide Elkartea. Euskal Herriko esperientziak transmititzeko eta komunikatzaile indigenak formatzeko jardunaldiak egin genituen ekainean Quiton eta tailer haien emaitza izan zen lehen saio hura.

Euskal Herriko esperientzia ispiluan

Bizkaiko Foru Aldundiak eta Arrasateko Udalak diruz lagundu duten egitasmoaren baitan, kate hau eta Kawsay fundazioak abian jarri nahi duen beste kitxuerazko telebistaren sorrera laguntzen aritu gara aurreko hileotan.

Otsailean Euskal Herrian izan ziren hemengo esperientziak ezagutzen, Huhezin eman genituen formazio saioak hartzen eta hemengo telebistak bisitatzen.

Orain hasi dira beren bidea egiten. Bejondaiela.