Ongietorri eta esker hitzekin hasi zen ekitaldia Maddi Iñarra eta Txema Abarrategi garabidetarrek aurkeztuta. Hasierako hitzartzea Iñaki Martinez de Luna Garabideko lehendakariak egin zuen, besteak beste, honakoa esanez: "hilabete honetan bizitakoa eta gero, bihotzez, gonbidatu nahi zaituztet, hizkuntza lankidetzan bezala hizkuntza egiten dugun guztiaren, bizitzaren beraren erdigunean jartzera". Ondoren Eusko Jaurlaritzako Garapenerako Lankidetzaren Euskal Agentziako zuzendari den Paul Ortegak hartu zuen hitza eta nabarmendu nahi izan zuen "gizarte mugimenduen eta erakundeen arteko lankidetza bultzatuz, hizkuntza lankidetzan egiten den bezala, garenetik egingo diogula aurre munduko arazo globalei".

Jarraian, komunitatez-komunitate Ikastaldiko partaideak oholtzara igotzen hasi ziren eta diploma jaso ondotik opari bana egin zieten Hizkuntza Gidaritzari buruzko Ikastaldian modu batera edo bestera (irakasle, babesle, boluntario…) parte hartu duten ordezkari euskaldunei. Aretxabaletatik abiatu zen bi ordu baino gutxiagoan hizkuntza gutxituen eskutik egin genuen mundu bira eta, hasteko, ondoko bost herriak ezagutu genituen:

• Txema Abarrategi garabidetarrak "Moroak gara behelaino artean?" galdetuz agurtu zituen amazigh ordezkaria eta Mikel Mendizabal, beste askoren artean, Garabideko boluntario, Ikastaldiko irakasle eta mendira egin genuen ateraldian behelaino artean gidari izan genuena.
• Kolonbiako nasa ordezkariak, Ana Delia Tenorio eta Virgilio Quiscue, Ikastaldian irakasle izan duten Euskaltzaleen Topaguneko Jasone Mendizabalek lagunduta egin zuten oholtzarako bidea. Oparitan nasen bandera gorri-berdea jaso eta jantzi zuen Mendizabalek.
• Aramaioko alkate Lierni Altuna eta Gloria Puc Guatemalako kaqchikel ordezkariek bat egin zuten taula gainean. Danborra jaso zuen Altunak oparitan, “elkarren taupaden doinuan, bi hizkuntzen biziberritzeek bihotzetik-bihotzera egin dezaten aurrera”.
• Martin Hernandez eta Hernan Cayulef maputxeek Aurten Bai Fundazioko Mikel Etxebarria lagundu zuten eszenatokian. Mikelen hitzak argigarriak izan ziren oso: "Aurten Bai fundazioan duela asko hasi ginen hizkuntza gutxituen aldeko Europako sareetan lanean, baina orain mundura egin dugu salto hizkuntza lankidetzari esker".
• Socorro Cauich eta Oscar Chan yukatango maiak Sakanako Guaixe Fundazioko Alfredo Alvarorekin egon ziren taula gainean. Oparitan "Guaixe" (oraintxe) hitza jaso zuen aitzinako glifo maiatan idatzita eta baita olerki bat ere: "aquí estamos, aunque no quieran, aunque duela.(…) Como un arbol cambiaremos las hojas, pero nunca las raices" [“hemen gaude, nahi ez badute ere, mingarria bada ere. (…) Zuhaitzen gisan aldatuko ditugu hostoak, baina inoiz ez sustraiak”]. Alfredok, bide beretik, erantzun zien: "gurpiletan makilak sartu arren bidean jarraitzen dugu, elkarrekin indarrak batuz beti aurrera. Eta kontrakoa pentsatu dezaketen arren: no estamos locos, sabemos lo que queremos [ez gara eroak, badakigu zer nahi dugun]"

Intermezzo moduko bat eginez Ikastaldian izan ditugun bi praktikarien lan izugarria txalotzeko tarte bat hartu genuen. Batetik, EHUko Letren fakultateko Ainhoa Moron izan dugu blogari lanetan eta, bestetik, Mondragon Unibertsitateko HUHEZI fakultateko Jon Flores astez-aste bideokronikak egiten. Hain zuzen ere, lau bideokronikak ikusi genituen:

Ondoren, munduan biraka jarraitu genuen hizkuntza gutxitu batetik bestera:

• "Intentzio onak ez dira aski gure hizkuntzak biziberritzeko, elkarlanean jarraitzeko beharra dugu" bota zuten irmo Mexikoko nawat komunitatearen izenean Tosepan kooperatiba taldeko Alvaro Aguilar eta Amelia Dominguezek, taula gainean euskara eta berrikuntza soziala uztartzen dituen EMUN kooperatibak lagunduta. Txerra Rodriguez emunkidea ez zen atzean gelditu bere hitzartzean: "Zuek asko eta asko ikasi duzuela diozue, baina guk are gehiago ikasten dugu zuekin. Datorren astean zuenera noa berriro lanera, beraz aldez aurretik eskerrik asko horretarako aukera emateagatik".
• Oholtzan partaide gazteena hartu genuen Nancy Quispe aimara bere hilabeteko alabarekin igo zenean Eskoriatzako Luis Ezeiza eskolako ordezkariarekin batera. Quispek esan zuen: "Energiaz betetzeko opari bat egin nahi nizuke: neguan zein udan bizi den lore aimara, jantzian bordatua, aurrerantzean biok soinean eraman dezagun". Garabidetarrok Argitxoren panpina oparitu nahi izan genion alabatxoari, hemendik 18 urtera Ikastaldean parte hartzeko gonbidapenarekin batera.
• Ines Garciak, EHUko Munduko Hizkuntza Ondarearen UNESCO Katedraren izenean, lagun izan zituen guarani komunitateko Elizabeth Gutierrez eta Yovana Aireyu. Gogora ekarri nahi izan zuten Boliviako estatu plurinazionalean Charagua udalerria, azaleran Euskal Herria halako hiru dena, lehena izan dela autonomia lortzen eta horrek aurrekaririk gabeko aukera eskaintzen digula hizkuntza biziberritzeko esperientzien trukean aritzeko euskaldun eta guaraniei.
• Mundu bira bukatu aurretik Guatemalako k’iche herriko Juan Jose Colop-ek eta Eusko Jaurlaritzako Garapenerako Lankidetzaren Euskal Agentziako zuzendari den Paul Ortega izan genituen taula gainean. Zutik, txaloka jarri zuen Colopek publikoa, txalo bana ailegatu zedin  Ikastaldia posible egin duten eragile guztiei. Halaber, sinbolismoz betetako laborari gerrikoa eta musika tresna bat oparitu zizkion Ortegari.
• Ekuadorreko kitxua komunitatea izan zen hizkuntza gutxituen eskutik munduari emandako biraren azken geldialdia. Fagor Taldeko idazkari teknikoa den Leire Okarantzak opari laukoitza jaso zuen Emilio Guaman eta Miguel Calapi kitxuen eskutik: “ura, lurra, haizea eta sua. Naturari lotuta bizi gaitezen beti, gure lurrean ‘estralurtarrak’ izan ez gaitezen”.

Ekitaldiaren amaieran hitzak motz gelditu bazitzaizkigun ere eskerrik beroenak eman nahi izan genizkizuen, beste behin, ZUEI. Nork bere moduan, egunez-egun hizkuntza lankidetzaren ametsa errealitate eginarazten duzuen ZUEI guztioi, mila esker. Iluntzea borobiltzeko, nola bestela, elkarrekin kantuan agurtu genuen Ikastaldia: